東話資料館最新著作《廣東話潮語唔止1000年》，由最新二〇二〇年至今嘅例如「流量密碼」、「0尊」、「跌嘢唔好搵」、「自肥」，一直向前數，「離地」、「有請小鳳姐」、「火星文」、「屈機」，到九十年代嘅「方丈」、「騎呢」，八十年代嘅「係咁先，唔係咩呀」、「滴汗」、「符碌」，七十年代嘅「的士夠格」、「拉柴」，六十年代嘅「要錯都係社會嘅錯」，五十年代嘅「你班馬騮」、「飽死荷蘭豆」，再繼續數前嘅「行路上廣州」、「電燈柱掛老鼠箱」、「放飛機」；再早啲香港開埠時期嘅「福壽膏」、「賣豬仔」、晚清時期嘅「穿崩」、「打落水狗」；再去到古代清潮時期嘅「做架梁」，明朝時期嘅「飛天光棍」、「發雞盲」，元朝時期嘅「收科」、「趕頭香」，宋朝時期嘅「帶挈」、「巴閉」，五代十國時期嘅「大食」、「眼中釘」，唐朝時期嘅「金叵羅」等等等等。

數完咁多潮語，仲會略略講解「潮語同新詞嘅分別」、「香港潮語著作」同「網絡潮語文化」，希望你睇完，對於出現唔止1000年嘅潮語有多一啲了解。
 
 
| 目錄 |
 
1 現代新潮語
2. 現代流行語
3. 近代流行語
4. 古代流行語
5. 潮語同新詞嘅分別
6. 香港潮語著作
7. 網絡潮語文化
 
 
| 內容節錄 |
 
打你咩！ （daa2 nei5 me1）
 
呢句嘢係用個「打」字代替原本嘅字嚟完成句粗口。
 
源自Error成員Dee Gor嘅口頭禪。佢喺ViuTV電視節目入面想要表達出自己嘅憤怒，但係又唔可以喺電視上講粗口，於是就用咗個「打」字嚟代替個粗口字嘅發音，例如講：「打你咩！成日講粗口，無啲禮貌。」
 
 
跌嘢唔好搵 （dit3 je5 m4 hou2 wan2）
 
意思係跌咗嘢試吓唔好揾，因為你越急佢越會繼續消失，唔搵佢就可能會走番出嚟。
 
呢句嘢係出自YouTube頻道「試當真」成員MC $oHo & KidNey〈跌嘢唔好搵〉嘅歌詞，意思係指如果有嘢跌咗，只要唔去搵就會重新出現，唔使嬲同激氣嘅。
 
倒轉地球(dou2 zyun3 dei6 kau4)
 
「來吧倒轉地球，全部摯友密謀；送走擔憂要唞唞信開心會長壽⋯⋯」
 
源於陶大宇喺中國一次表演翻唱劉德華嘅歌〈倒轉地球〉片段，喺台上用佢獨特嘅唱腔同舞步又跳又唱。之後條片段喺網上再被瘋傳，成為中港兩地紅遍網絡嘅熱話焦點。
 
鼓勵性質說話（gu2 lai6 sing3 zat1 syut3 waa6）
 
有網民用嚟指講過唔算數；係指有以此嚟做走數嘅藉口。
 
源於林大輝曾經喺頒獎禮同乒乓球代表黃鎮廷傾談，向對方講：「做好啲，奧運有機會，得到獎我包你做業主。」後來林大輝中學有兩位校友喺奧運得獎後冇成為業主，所以網民就以林大輝當年話包做業主係「鼓勵性質嘅說話」，比喻有人走數。
 
阿姨我不想努力了！（aa3 ji1 ngo5 bat1 soeng2 nou5 lik6 liu5）
 
呢句嘢起源喺內地傳出有「富婆徵求年輕男友」嘅消息，之後就有位男網民指自己甘願用肉體嚟換取唔使用努力做嘢，而又可以過住啲享受生活「求包養」嘅嘲諷說話。
 
不過又有傳話，最先喺網上貼出呢句嘢嘅係一位女生，佢係為咗一個好討厭嘅男同學而喺「徵友啟示」廣告發出嘅應徵。正所謂年少不知軟飯香，努力奮鬥要三十年！
 
——摘自本書一四至一六頁
 
 
| 關於作者 |
 
廣東話資料館 Cantonese Museum
Facebook：https://www.facebook.com/CantoneseMuseum/
Website：http://cantonesemuseum.blogspot.com/